Piktura e humbur e Rembrandt gjendet pas 60 vjetësh

Një pikturë e humbur prej kohësh nga Rembrandt është rizbuluar dhe vërtetuar nga ekspertët, pasi vendndodhja e saj nuk dihej për dekada të tëra.

Piktura e Rembrandtit “Vizioni i Zakarias në Tempull”, e vitit 1633, u përjashtua nga një listë e veprave të mjeshtrit holandez në vitin 1960 dhe u zhduk pasi iu shit një koleksionisti privat vitin pasardhës.

Por u rishfaq kur pronarët e saj e paraqitën për testime në Rijksmuseum në Amsterdam, i cili ndërmori një ekzaminim dy-vjeçar.

“Kur e pashë në studion tonë kur u restaurua, u mahnita menjëherë nga fuqia e jashtëzakonshme që ka”, tha drejtori i Rijksmuseum, Taco Dibbits.

Muzeu Rijks merr shumë email-e nga njerëz që kërkojnë informacion në lidhje me pikturat që kanë trashëguar ose blerë, tha Dibbits. Në këtë rast, ata e dinin se mund të ishte diçka e veçantë.

“Na erdhi me email dhe një nga kuratorët tanë mendoi, ky është një imazh vërtet interesant, ne e dimë pikturën për më shumë se 100 vjet, por nuk e kemi parë kurrë”.

Muzeu konfirmoi autenticitetin pasi studioi ngjyrat, të cilat përputhen me ato të përdorura nga Rembrandt gjatë asaj periudhe, si dhe teknikën e pikturimit dhe ndërtimin e shtresave, të cilat janë gjithashtu të krahasueshme me veprat e tij të tjera të hershme.