Akuza për përvetësim të 270,000 dollarëve nga famullia, Peshkopi i Kalifornisë jep dorëheqjen

Peshkopi katolik i Kalifornisë në zonën e San Diegos ka dhënë dorëheqjen mes akuzave për përvetësim të 270,000 dollarëve nga famullia e tij, njoftoi të martën Papa Leo XIV.

Peshkopi Emanuel Shaleta u deklarua i pafajshëm për 17 akuza për krime të rënda, përfshirë pastrim parash, gjatë një seance dëgjimore ku morën pjesë shumë mbështetës të tij.

69-vjeçari akuzohet për përvetësim të parave nga katedralja katolike e Shën Pjetrit në El Cajon, në lindje të San Diegos. Ai u arrestua javën e kaluar në aeroportin ndërkombëtar të San Diegos, ndërsa po përpiqej të largohej nga vendi.

“Dikush nga kisha e Shaletas dha një deklaratë dhe dokumentacion “që tregonin përvetësim të mundshëm nga kisha”, tha zyra e sherifit të qarkut të San Diegos.

Prokurori Joel Madero tha se akuzat kundër Shaletas lidhen me pagesat mujore të qirasë prej më shumë se 30,000 dollarësh nga një qiramarrës i sallës shoqërore të kishës, të cilat dyshohet se mungonin. Ai tha se kishte mospërputhje në llogaritë e kishës dhe se Shaleta dha histori krejtësisht të paarsyeshme se ku po shkonin ato para.

Gjykatësi caktoi një lirim me kusht në 125,000 dollarë. Madero tha se Shaleta përbënte rrezik arratisjeje, por avokati i peshkopit tha se fluturimi i së enjtes ishte planifikuar prej kohësh.

Gjatë një meshe të kohëve të fundit, Shaleta iu drejtua akuzave kundër tij, duke thënë se ai kurrë nuk ka abuzuar me asnjë qindarkë nga paratë e kishës.

Vatikani tha në buletinin e tij të përditshëm të martën se Leo kishte pranuar dorëheqjen e Shaletas sipas kodit të ligjit kanonik për kishat e Ritit Lindor, i cili i lejon Papës të bjerë dakord nëse një peshkop kërkon të japë dorëheqjen. Papa Leo emëroi Peshkopin Saad Hanna Sirop si administrator të përkohshëm.