Gjenden të pajetë dy turistë pas përmbytjeve në Australi

Autoritetet australiane kanë gjetur trupat e dy turistëve kinezë me çantë shpine që u zhdukën në ujërat e përmbytjeve në shtetin e Queensland.

Viktimat, një burrë 26-vjeçar dhe një grua 23-vjeçare, po udhëtonin nga Brisbane drejt rajonit North Burnett kur u raportuan të zhdukur të martën pasi nuk arritën në destinacionin e tyre.

Policia bëri të ditur se automjeti i tyre, një Subaru Forester i argjendtë, u gjet të mërkurën pasdite pranë qytetit Kilkivan, afër Gympie, pas një operacioni të gjerë kërkimi ku u përfshinë oficerë policie, State Emergency Service dhe helikopterë.

Të enjten, autoritetet konfirmuan se dy trupa u gjetën brenda automjetit, i cili ishte zhytur në ujërat e përmbytjes. Familjarët janë njoftuar dhe policia po bashkëpunon me konsullatën kineze.

Ndërkohë, në ditët e fundit janë lëshuar paralajmërime të shumta për përmbytje në të gjithë Queensland dhe pjesë të Northern Territory, pasi shirat e rrëmbyeshëm kanë bërë që nivelet e lumenjve të vazhdojnë të rriten.

Qindra shtëpi janë përmbytur në disa qytete, përfshirë Bundaberg dhe Katherine. Autoritetet kanë paralajmëruar gjithashtu për praninë e krokodileve në ujëra dhe u kanë kërkuar banorëve të qëndrojnë larg tyre.

Ndërkohë në Darwin banorëve u është kërkuar të reduktojnë konsumin e ujit dhe ta ziejnë ujin e pijshëm, pasi stacioni i pompimit në digën që furnizon pjesën më të madhe të qytetit u përmbyt dhe ndaloi së funksionuari.