Përhapja e coronavirusit, rriten infektimet në SHBA e Rusi, Franca avancon vaksinimet

Numri i personave që kanë vdekur në SHBA nga COVID-19 ka kaluar kuotën e 600 mijë. Shifra e zymtë vjen pavarësisht procesit të vaksinimit.

Sa i takon viktimave ditore, ato kanë arritur në një mesatare prej 340 personash, një rënie e fortë nga niveli prej 3.400 që ishte në mes të janarit.

Në Francë, vaksinimi kundër COVID ka përfshirë edhe fëmijët e moshave 12 vjeç e sipër në përpjekje për të arritur imunitetin dhe ngadalësuar përhapjen e varianteve. Në Stadiumin e Francës në Paris, mbi 130 vaksinime u kryen në ditën e parë.

“Mendoj se është pozitive që im bir u vaksinua. Së pari për atë vetë, pastaj për ne, gjyshen e tij dhe njerëzit e tjerë përreth”, shprehet një grua.

Disa prej të rinjve kanë pasur edhe frikë.

“Në fillim kisha shumë frikë, por tani jam në rregull. Nuk më dhembi”, thotë një prej tyre.

Ndërkohë, në Moskë autoritetet po rihapin disa nga spitalet e COVID-19, pas raportimeve për një rritje të infeksioneve. Kryeqyteti rus ka regjistruar mbi 6 mijë raste në 24 orët e fundit, niveli më i lartë prej muajsh.

Kryebashkiaku i qytetit u ka bërë thirrje qytetarëve që të vaksinohen.

“Është me rëndësi që këto ditë të vizitoni qendrat e vaksinimit. Ato janë të hapura dhe të aksesueshme, ndaj ne ftojmë banorët e Moskës të shkojnë të marrin dozën. Kështu do të mbroni veten dhe të dashurit tuaj”, ka apeluar Sergey Sobyanin, kryetar i Bashkisë së Moskës.

Ndërkohë, në Londër punonjësit e teatrove kanë paralajmëruar qeverinë se për disa shfaqje mund të jetë hera e fundit për shkak të shtyrjes së rihapjes si pasojë e përhapjes së variantit ‘Delta’.