PD kërkon interpelancë me Ministrin e Brendshëm për gjendjen në Policinë e Shtetit

Grupi Parlamentar i Partisë Demokratike ka dorëzuar pranë Kryesisë së Kuvendit një kërkesë për zhvillimin e një interpelance urgjente me Ministrin e Punëve të Brendshme, Besfort Lamallari. Kërkesa, e protokolluar më 26 mars 2026, bazohet në shqetësimet e ngritura nga raporte ndërkombëtare, sipas dokumentit zyrtar tw dorwzuar dhe hetime të fundit lidhur me integritetin e strukturave të Policisë së Shtetit.

Në argumentimin e kërkesës, opozita i referohet Raportit të Zgjerimit të Komisionit Evropian për vitin 2025, i cili thekson se Policia e Shtetit mbetet e ekspozuar ndaj korrupsionit dhe se procesi i vetingut policor ka pasur një ndikim të kufizuar deri më tani.

Dokumenti citon gjithashtu Raportin e Departamentit Amerikan të Shtetit, ku vihet theksi te ndikimi i grupeve të krimit të organizuar në trafikun e drogës dhe sfidat që paraqet sundimi i dobët i ligjit dhe pandëshkueshmëria.

Kërkesa për interpelancë liston disa ngjarje që, sipas dokumentit, kanë cenuar besimin publik tek institucionet e sigurisë:

1. Hetimet e aplikacioneve të koduara, përmenden rastet e ish-zyrtarëve të lartë, si Oltion Bistri dhe Henerigert Mitri, të cilët u vunë nën hetim pas dekriptimeve të platformave Sky ECC dhe EncroChat.
2. Ngjarja e Rinasit, dokumenti referon atentatin e 11 nëntorit ndaj Gilmando Danit, ku prania e një punonjësi të Agjencisë së Mbikëqyrjes Policore (AMP) në shoqërinë e viktimës ka ngritur pikëpyetje mbi procedurat e rekrutimit.
3. Statistikat e ndjekjes penale, sipas të dhënave të cituara nga Prokuroria e Posaçme (SPAK), deri në fund të vitit 2023 ishin rreth 70 oficerë policie nën hetim për lidhje me krimin e organizuar, ndërsa arrestimet nga AMP janë rritur nga 102 raste në vitin 2023, në 163 raste deri në fund të vitit 2024.

Përmes kësaj interpelance, e cila pritet të realizohet nga deputeti Klevis Balliu, kërkohen sqarime zyrtare mbi:

1. Numrin aktual të punonjësve të policisë nën hetim apo të arrestuar gjatë periudhës 2023–2026.
2. Kriteret e përdorura për emërimet dhe promovimet në pozicionet drejtuese të Policisë së Shtetit.
3. Masat e ndërmarra për të parandaluar dekonspirimin e operacioneve policore.
4. Rezultatet konkrete të procesit të verifikimit të integritetit (vetingut) brenda radhëve të forcave të rendit.

Kërkesa mban firmat e disa deputetëve të opozitës, mes të cilëve Gazment Bardhi, Klevis Balliu dhe Belind Këlliçi, dhe pritet të përfshihet në rendin e ditës të seancës së parë plenare në vijim.