8 të arrestuar për rrëmbimin e reperit Gucci Mane, prokurorët: Planin e udhëhoqi një artist tjetër

Reperi Gucci Mane dyshohet se u rrëmbye nën kërcënimin e armës në Dallas në fillim të këtij viti, duke çuar në arrestimin e tetë burrave, përfshirë një artist tjetër me kontratë me labelin e tij.

Prokurorët pretendojnë se reperi Pooh Shiesty udhëhoqi grabitjen nën maskën e një takimi, duke e mbajtur Mane-n rob brenda një studioje regjistrimi dhe duke e detyruar të nënshkruante dokumente që e lironin nga kontrata e tij.

Mane është një artist me bazë në Atlanta i cili ka bashkëpunuar me Usher, Doja Cat, Drake dhe yje të tjerë. Ai themeloi labelin e tij, 1017 Records, në vitin 2007 dhe Williams Jr nënshkroi kontratë si artist në vitin 2020.

Të pandehurit, të cilët ende nuk kanë deklaruar fajësinë, mund të përballen me burgim të përjetshëm nëse dënohen. Tetë nga nëntë të pandehurit u arrestuan të mërkurën në Dallas, Memphis dhe Nashville dhe u akuzuan në gjykatën federale për rrëmbim dhe grabitje të armatosur.

Një i dyshuar mbetet i lirë dhe hetuesit po punojnë me autoritetet në shtetin e Xhorxhias për ta gjetur atë, tha prokurori amerikan Ryan Raybould në një konferencë për shtyp të enjten.

Incidenti ndodhi më 10 janar, thuhet në një padi federale, kur Williams Jr duhej të ishte nën arrest shtëpiak për një dënim të mëparshëm për konspiracion me armë zjarri.

Ai dyshohet se ishte i shoqëruar nga tetë të bashkëpandehur, përfshirë babanë e tij, Lontrell Williams Sr, të cilët të gjithë akuzohen për pjesëmarrje në krim.

Një deklaratë e betuar nga FBI thotë se Williams Jr i drejtoi një “pistoletë të zezë të tipit AK” Mane-s dhe e detyroi të nënshkruante dokumentet. Ai gjithashtu dyshohet se i vodhi unazën e martesës, orën, vathët dhe paratë e Mane-s.