VIDEO/ Përmbytjet paralizojnë rajonet e Rusisë! Dy persona humbasin jetën, mijëra të tjerë evakuohen

Një grua dhe vajza e saj vdiqën dhe 4,000 njerëz u evakuuan nga shtëpitë e tyre kur një digë në republikën ruse të Dagestanit shpërtheu për shkak të shirave të rrëmbyeshëm, tha të premten Ministria Ruse e Mbrojtjes Civile.

Rreth 2,000 shtëpi janë përmbytur në rajonin e Derbentit në Detin Kaspik. Makhachkala, kryeqyteti i Dagestanit, u godit gjithashtu nga përmbytjet, me komplekset e apartamenteve në rrezik shembjeje, sipas faqes rajonale të lajmeve Golos Dagestana.

Videot në mediat sociale tregojnë ndërtesa të zhytura përgjatë një ure të shembur në autostradën Kavkaz, e cila është strategjikisht e rëndësishme për rajonin.

Autoritetet rajonale kanë ngritur strehimore emergjente dhe po përdoren helikopterë për të nxjerrënjerëzit e bllokuar. Ministria tha se reshje të mëtejshme mund të godasin rajonin, me erëra me shpejtësi mbi 120 km/orë. Priten edhe rrëshqitje dheu, tha ministria.

Shira të rrëmbyeshëm kanë goditur rajonin e Kaukazit të Veriut që nga fundi i marsit. Përmbytjet e nënstacioneve të energjisë kanë shkaktuar ndërprerje të energjisë elektrike në gati 20 rajone të Dagestanit.

Gjendje e jashtëzakonshme është shpallur në Makhachkala, Khasavyurt, Kaspiysk dhe Derbent.

Në fund të marsit, përmbytjet çuan në evakuimin e më shumë se 3,300 njerëzve nga rajoni, ndërsa 3,500 shtëpi u raportuan të përmbytura. Autoritetet kishin thënë në atë kohë se dëmi arriti në 50 milionë dollarë, por kjo shifër tani ka të ngjarë të rritet ndjeshëm.