Agjencia e OKB-së paralajmëron për krizë shkatërruese humanitare në Liban

Programi Botëror i Ushqimit ka paralajmëruar për një krizë “shkatërruese humanitare” në Liban, ndërsa situata në terren vazhdon të përkeqësohet.

Sipas agjencisë së OKB-së, më shumë se një milion njerëz janë zhvendosur në të gjithë vendin, ndërsa vetëm në 48 orët e fundit janë raportuar qindra viktima si pasojë e sulmeve.

Të dhënat paraprake nga Ministria e Shëndetësisë e Libanit bëjnë të ditur se të paktën 303 persona janë vrarë dhe 1,150 të tjerë janë plagosur nga sulmet izraelite gjatë së mërkurës.

Drejtoresha e WFP-së për Libanin, Allison Oman Lawi, theksoi se organizata ka qenë në terren që nga fillimi i krizës, duke ofruar ndihmë ushqimore dhe financiare për qindra mijëra qytetarë.

Megjithatë, ajo paralajmëroi se vazhdimi i operacioneve humanitare varet nga sigurimi i aksesit të qëndrueshëm dhe të sigurt në zonat e prekura.

“Pa siguri dhe pa mundësinë për të arritur njerëzit kudo që janë, përfshirë zonat më të goditura, bëhet shumë më e vështirë të ofrohet ndihma jetike nga e cila varen familjet,” u shpreh ajo.