Pasojat e pandemisë, BQE: Burrat humbën më shumë vende pune se gratë

Burrat pësuan humbjen më të madhe të vendeve të punës në bllokun evropian gjatë pandemisë. Kështu deklaroi të mërkurën Banka Qendrore Evropiane, duke hedhur poshtë parashikimet se gratë do të ishin më të prekurat, si punonjëse në sektorët më kritikë.

Punësimi në zonën euro ra me rreth 3.1 milionë vende pune mes tremujorit të katërt të 2019-s dhe së njëjtës periudhë të 2020-s.

“Humbjet në punësim në tremujorin e katërt të 2019-s dhe atë të 2020-s ishin kryesisht të përqendruara në sektorin e shitjeve dhe atë të transporteve për burrat dhe në sektorin e rekreacionit dhe shërbimeve personale për gratë”, tha BQE.

Rreth 1.9 milion të këtyre vendeve vlerësohet t’u përkasin burrave dhe 1.2 milion grave. Me gratë që mbulojnë kryesisht sektorët që lidhen me aktivitete të kohës së lirë dhe mikpritjes, disa ekonomistë paralajmëruan se ato rrezikonin të dilnin më të humbura, por studimi sugjeron se gratë gjetën punë të reja më lehtë se burrat.