U akuzua për qetësues që krijojnë varësi, J&J jep $230 milionë për të mbyllur çështjen

Kompania Johnson & Johnson ka pranuar të paguajë një shumë prej $230 milionë dollarësh ndaj shtetit të Nju Jorkut, për të shuar akuzat se ky gjigand i farmaceutikës ka kontribuuar në përshkallëzimin e “krizës së opiatëve”, u shpreh kryeprokurorja, Letitia James këtë të shtunë.

Prej kohësh “kriza e opiatëve” është kthyer në një shqetësim të madh për shtetin amerikan pas dhënies me recetë të ilaçeve qetësues me përmbajtje të opiatëve (substancë që krijon varësi) edhe për trajtimin e problemeve minimale si thyerja e gjymtyrëve, gjë që ka kontribuuar me kalimin e kohës, në shtimin e atyre që kthehen në përdorues të varur ndaj këtyre ilaçeve apo edhe drogave më të forta që përmbajnë këtë substancë.

Kompania farmaceutike J&J gjithashtu pranoi t’i jepte fund një herë e mirë prodhimit dhe shpërndarjes së opiatëve në shtetin e Nju Jorkut si dhe në të gjithë vendin.

Johnson & Johnson “ndihmoi të përshkallëzonte këtë krizë, por sot ata kanë pranuar të lënë mënjanë biznesin e opiatëve – jo vetëm në Nju Jork, por në të gjithë vendin,” tha James.

Marrëveshja që përfshin një padi të ngritur nga James në vitin 2019, e mbylli çështjen që rëndonte kundër Johnson & Johnson, si pjesë e procesit gjyqësor që nisi si pasojë epidemisë që solli vdekjen e të paktën 500.000 individëve gjatë dy dekadave të fundit.

Gjatë deklaratës së tyre këtë të shtunë, vetë kompania Johnson & Johnson e minimizoi përgjegjësinë e tyre si dhe njoftimin e kryeprokurores. Ata thanë se kjo marrëveshje përfshinte vetëm dy qetësues, të krijuar nga një kompani filiale që përfaqësonte vetëm 1% të tregut, të cilat prej kohësh nuk shiteshin më në tregun amerikan.

Kjo marrëveshje ishte një nga zhvillimet e fundit në botën komplekse të padive të lidhura me opiatët në të gjithë SHBA-në. Ajo reflekton një rrugë që po ndërmerret nga shumë kompani të mëdha farmaceutike të cilat parapëlqejnë të pranojnë ujditë apo marrëveshjet ku i duhet të paguajnë shuma të mëdha parash, përpara se të dalin para gjyqit, pasi e dinë që do t’u duhej të shpenzonin shumë më tepër në atë mënyrë.

LEXONI GJITHASHTU:

• Skandali farmaceutik në Francë, shpallet fajtore kompania që shiti një prej ilaçeve të saj si pilulë dietike
• Ngadalësimi i vaksinimit në Itali, Conte paralajmëron nisma ligjore kundrejt kompanive farmaceutike
• Rama me distributorin e “Sinovac”: Diskutuam për ndërtimin e fabrikës së vaksinave në Shqipëri