Amerika në kundërsulm, Biden paralajmëron përgjigje me të njëjtën monedhë për sulmet kibernetike

Presidenti amerikan, Joe Biden deklaroi se Uashingtoni mund të ashpërsojë reagimin e tij ndaj sulmeve kibernetike në dëm të infrastrukturës së Shteteve të Bashkuara, duke sulmuar serverët e hapësirës kibernetike prej nga vijnë këto agresione.

“Po”, u përgjigj ai për gazetarët, kur u pyet se cila do të ishte përgjigjja e duhur ndaj sulmeve të tilla.

Biden tha gjithashtu se pret njëfarë bashkëpunimi nga Moska, kur një komision i përbashkët ruso-amerikan për çështjet kibernetike do të takohet muajin e ardhshëm.

Biden foli për gazetarët teksa po ngjitej në bordin e “Air Force One” për të shkuar në shtëpinë e tij në Delauer.

Më herët gjatë së premtes, Biden tha se i kishte bërë presion homologut rus Putin që të vepronte kundër grupeve që kryejnë sulme të tilla, me qëllim zhvatjen.

Lloji i ri i agresioneve kibernetike, me hakerat që marrin peng të dhënat në këmbim të një pagese, po kthehet në një pengesë për bizneset që veprojnë në mbarë botën.

Kriminelët e kanë përdorur atë për të paralizuar mijëra organizata amerikane.

Shumica e bandave që veprojnë në këtë fushë thuhet nga autoritetet amerikane se veprojnë në Rusi, me dijeninë, në mos konsensusin e qeverisë vendase.

LEXONI GJITHASHTU:

• BE me strategji të re kundër sulmeve kibernetike, planifikon njësi të përbashkët mbrojtjeje
• Telefonata e parë mes Biden dhe Putin, bisedojnë mbi Navalny dhe sulmet kibernetike ruse