Franca zhvillon negociata me Rusinë për emërtimin e pijes së famshme

Franca po kërkon negociata të vazhdueshme me Rusinë, si mënyra më e mirë për të zgjidhur përplasjen mbi shampanjën.

Deklarata është bërë nga ministri francez i Tregtisë, pak ditë pasi Rusia miratoi një ligj që u kërkon prodhuesve francezë të vendosin përshkrimin “verë e gazuar” në etiketën e pasme të shishes.

“Jemi duke përfunduar analizën e ligjit rus, por duket se ky nuk është një problem vetëm për shampanjën, por edhe për përcaktime të tjera gjeografike siç është konjaku. Ne mendojmë se shtegu i negociatave është më i miri për të zgjidhur problemin për këto përcaktime gjeografike”, tha ministri Franck Riester

Ndryshe, shampanja vendase ruse, e njohur si “shampanskoje”, nuk do të duhet të vendosë një term të tillë në etiketë.

Ministri i Agrikulturës, Julien Denormandie tha se qëndrimi i Francës lidhur me çështjen është i qartë: Shampanja është franceze dhe vjen nga rajoni me të njëjtin emër.

“Nuk është më e mundur të përdorim fjalën “shampanjë” kur shesim shishet tona në Rusi. Qëndrimi i qeverisë lidhur me këtë çështje është shumë i qartë: shampanja është franceze dhe vjen nga rajoni i Shampanjës”, tha ai.

Emri “Shampanjë” gëzon një status që është i mbrojtur në mbi 120 vende të botës. Qeveria franceze ka deklaruar se do të kërkojë ta zgjidhë çështjen në Organizatën Botërore të Tregtisë.