Shtypen protestat në Kubë, SHBA-të kritikojnë regjimin

Kontingjente të shumta të policisë patrulluan kryeqytetin e Kubës, Havana, pas protestave të mëdha kundër fundit të rezervave ushqimore dhe çmimeve të larta në kohë pandemie.

Presidenti i Kubës deklaroi se manifestimet ishin organizuar nga komuniteti kuban në Amerikë përmes rrjeteve sociale.

Ndërkohë, sekretari amerikan i Shtetit, Antony Blinken deklaroi se protestuesit po kërkonin të drejtat bazë.

“Në shumë raste, protestuesit paqësorë u përballën me represion dhe dhunë. Administrata Biden-Harris qëndron pranë popullit kuban dhe popujve të tjerë në të gjithë botën që kërkojnë respektimin e të drejtave të tyre dhe që presin që qeveritë t’i dëgjojnë dhe jo t’u mbyllin gojën”, u shpreh Antony Blinken.

Protestat në Kubë shënuan pakënaqësinë më të madhe ndaj qeverisë në vendin e kontrolluar rreptësisht nga regjimi.

Autoritetet duken të vendosura t’i ndalojnë demonstratat. Kështu, disa dhjetëra protestues u arrestuan dhe u burgosën, ndërsa shërbimet e internetit thuhet se u ndërprenë për të penguar manifestuesit që të komunikonin me njëri-tjetrin.

LEXONI GJITHASHTU:

• Protesta anti-qeveritare në Kubë, presidenti Canel akuzon SHBA: Faji i bllokadës amerikane
• Protesta të mëdha në Kubë kundër qeverisë së Miguel Diaz-Canel
• Raul Castro tërhiqet nga drejtimi i Partisë Komuniste në Kubë