Rriten të ardhurat në krahasim me 2020, 39 mld lekë më shumë në buxhetin e shtetit

Për gjashtëmujorin e këtij viti në arkat e shtetit janë mbledhur 39 miliardë lekë më shumë se e njëjta periudhë e një viti më parë.

Periudha janar-qershor tregon se ekonomia shqiptare po e hedh pas krizën e pandemisë në vitin 2020.

Tabelat fiskale të Ministrisë së Financave evidentojnë se të ardhurat u rritën në masën 234 miliardë ose 104 % të planit të 6-mujorit, ku kontribut të madh kanë shënuar të ardhurat doganore dhe tatimore.

Nga ana tjetër, qeveria shpenzoi në pjesën e parë të vitit, 263 miliardë lekë, ose 30 miliardë lekë më shumë se vitin e kaluar.

Indeksimi i pensioneve, rritja e pagave të mjekëve e mësuesve si dhe investimet, janë zërat kryesorë që udhëhoqën rritjen e shpenzimeve.

Por, gjatë vitit 2020, dëmi financiar i shkaktuar nga abuzimet me tenderët, ka qenë 5 milionë euro.

Bazuar në raport-auditimin e kryer nga Ministria e Financave, sistemi i Prokurimit Publik është ndër fushat më problematike, që shkaktoi gjysmën e dëmit financiar në institucionet publike.

Ndërkaq, raporti tregon se dëmi i përgjithshëm ekonomik arrin në 10 milionë euro, dhe pas tenderëve peshën më të madhe të humbjeve e mbajnë abuzimet në sistemin e taksave, doganave dhe tatimeve me 3.9 milionë euro, ndjekur nga pagat, shpërblimet, koncesionet dhe administrimi i pronave.

LEXONI GJITHASHTU:

• 5 milionë euro dëm financiar nga tenderët gjatë vitit 2020
• Tenderët e bashkive dhe qeverisë, 3 kompani morën 370 mln euro
• “70% e tenderëve me probleme”, Rama-ministrave: Nëse nuk reagoni pas rekomandimeve, do shkoni në SPAK