Incident para vizitës së Erdogan në Qipro, anija patrulluese turke sulmon anijen qipriote

Të premten një anije e rojës bregdetare qipriote u sulmua nga një anije patrulluese turke në bregun verior të ishullit të ndarë etnikisht. Incidenti vjen pak ditë para vizitës së presidentit turk Rexhep Taip Erdogan në ishullin e ndarë etnikisht.

Sipas mediave lokale, anija turke përdori manovra të rrezikshme duke detyruar anijen qipriote të largohej nga zona duke u ankoruar në portin “Kato Pirgos”.

Sipas mediave greke, anija patrulluese (motovedeta) turke qëlloi në shenjë paralajmërimi ndaj anijes qipriote, fakt ky i konfirmuar edhe nga autoritetet vendase.

“Ky është një incident i shkaktuar nga pala turke që konfirmon edhe një herë qasjen agresive të treguar kohët e fundit. Anija qipriote po patrullonte zonën për emigrantë të mundshëm dhe sigurisht sjellja e motovedetës turke ngre dyshime mbi motivet e tyre që i shtynë të bëjnë një veprim të tillë“, u shpreh Marios Pelekanos, zëdhënës i qeverisë së Qipros.

Autoritetet qipriote deklaruan se kanë nisur mbledhjen e provave për të raportuar edhe në Organizatën e Kombeve të Bashkuara. Aktualisht ekziston një atmosferë e tensionuar në Qipro, për shkak edhe të vizitës së Erdogan ditën e hënë, në zonën turke të ishullit. Data 20 korrik është përvjetori i pushtimit turk në Qipro, çka e bën jo të rastësishme vizitën e presidentit turk.

LEXONI GJITHASHTU:

• Vihen nën kontroll zjarret që u morën jetën katër personave në Qipro
• Statusi i Qipros, Erdogan: Zgjidhje me dy shtete, Mitsotakis më sfidoi. Reagon kryeministri grek
• Erdogan viziton qytetin e braktisur të Varoshas në Qipron Veriore