Macron në listën e zyrtarëve të përgjuar nga programi ‘Pegasus’

Aktivistë, gazetarë dhe politikanë janë mes personave që dyshohet se janë shënjestruar nga një program spiunazhi i prodhuar nga një firmë private izraelite.

Në listë janë numrat e telefonit të 50 mijë personave që besohet se janë bërë objektiv i kompanisë NSO Group, që prej vitit 2016.

Software-i i programit, i quajtur “Pegasus” infekton ‘iPhone-t’ dhe pajisjet Android, duke u mundësuar operatorëve të nxjerrin mesazhe, foto, email-e, të regjistrojnë telefonata, si dhe të aktivizojnë fshehurazi mikrofonat dhe kamerat.

Nga ana e tij, grupi NSO mohon çdo akuzë. Ai thotë se programi i tij përdoret për të gjurmuar kriminelët dhe terroristët dhe është në dispozicion vetëm të ushtrisë, policisë dhe agjencive të inteligjencës të vendeve ku respektohen të drejtat e njeriut.

Presidenti francez, Emmanuel Macron është një nga liderët e shumtë botërorë që janë bërë objekt i sulmeve kibernetike në telefonat e tyre përmes programeve të spiunazhit.

Gazeta franceze “Le Monde” raportoi së fundmi se shërbimet marokene të inteligjencës kishin identifikuar një telefon që Macron e përdorte që prej vitit 2017.

Nga ana e saj, qeveria e Marokut ka mohuar që të ketë qenë kliente e kompanisë prodhuese të programit “Pegasus”.

Të jesh në listën e 50 mijë personave nuk do të thotë se programi është përdorur, por do të thotë se një person është shënjestër potenciale.

Sidoqoftë, ende nuk është e qartë nëse software-i ishte instaluar në telefonin e presidentit francez. Në listë ndodhen emrat e 600 zyrtarëve qeveritarë dhe politikanëve nga 34 vende të botës.

LEXONI GJITHASHTU:

• Çfarë është programi “Pegasus” dhe si mund të përgjojë telefonat?
• Sa e sigurt është Wi-Fi publike dhe a mund të jetë duke vjedhur të dhënat tuaja personale?