Britania e Madhe dhe Franca bashkojnë forcat kundër emigracionit ilegal

Britania e Madhe dhe Franca kanë rënë dakord të angazhojnë më shumë forca policore dhe të investojnë në teknologjinë zbuluese në bregun francez, në përpjekje për të ndalur varkat me emigrantë ilegalë nga brigjet britanike.

Konkretisht, Britania e Madhe do të ndihmojë në financimin e masave që do të aplikohen, përfshirë financimin e më shumë strehëve për emigrantët në Francë, si dhe investimin e 62.7 milionë eurove mes viteve 2021-2022.

Marrëveshja u arrit pas një takimi mes ministrit të Brendshëm francez, Gerald Darmanin dhe homologes britanike, Priti Patel.

Nga ana e saj, Franca do të dyfishojë numrin e forcave policore në bregun verior, mes qyteteve Boulogne dhe Dunkirk, si dhe përreth portit Dieppe, duke përforcuar patrullat ajrore që përpiqen të lokalizojnë varkat e vogla që synojnë të kalojnë kanalin.

Shumica e masave parashikohet të aplikohen në anën franceze për të parandaluar nisjen e varkave dhe Parisi zyrtar ka deklaruar se që prej vitit të kaluar ka lokalizuar një seri gomonesh që në total transportonin mbi 7.500 persona.

Të hënën, më 19 korrik të paktën 430 emigrantë kaluan Kanalin Anglez drejt Mbretërisë së Bashkuar, përfshirë gra dhe fëmijë, duke shënuar një rekord për një ditë të vetme.

LEXONI GJITHASHTU:

• Macron në listën e zyrtarëve të përgjuar nga programi ‘Pegasus’
• Britania kërkesë BE-së për një marrëveshje të re tregtare post-Brexit
• Përmbytjet shkaktojnë 190 viktima në Europë, fokusi tek rindërtimi