Danimarka shpëton afganët, marrëveshje për evakuimin e përkthyesve nga Kabuli

Ligjvënësit në Danimarkë kanë rënë dakord të evakuojnë 45 qytetarë afganë që punonin për qeverinë daneze në Afganistan dhe t’u ofrojë atyre rezidencë për të paktën 2 vjet.

Plani do të aplikohet për personat që kanë punuar në ambasadën daneze në Kabul, si përkthyes për trupat e këtij vendi.

“Ne, si vend që ka qenë i pranishëm në Afganistan për dy dekada, kemi pasur punonjës vendas në stafin tonë. Ndaj është përgjegjësia jonë t’i ndihmojmë këta njerëz. Dhe me këtë marrëveshje, ne mbajmë përgjegjësinë tonë”, tha Jeppe Kofoed, ministër i Jashtëm i Danimarkës.

Danimarka, sikurse vende të tjera perëndimore, përfshirë SHBA, tërhoqi së fundmi trupat e mbetura nga Afganistani. Vendi nordik e hapi ambasadën në Kabul në vitin 2006.

Ndërkohë, Gjermania, Holanda dhe Franca kanë pezulluar dëbimin e azilkërkuesve afganë, si pasojë e situatës së krijuar në vendin e përfshirë nga lufta.

Rreth 30 mijë afganëve në Gjermani u është kërkuar të largohen nga vendi, edhe pse autoritetet lokale kanë deklaruar se një gjë e tillë nuk do të ndodhë për momentin.

Rreth 1.200 afganë janë dëbuar nga vendet e BE-së që nga fillimi i vitit, 1 mijë prej të cilëve kanë pranuar vullnetarisht, ndërsa 200 të tjerë janë larguar me forcë.

LEXONI GJITHASHTU:

• Vijon ofensiva e talebanëve, pa përkrahjen e SHBA dhe NATO, afganët largohen nga shtëpitë
• Talebanët marrin Farahun, SHBA: Rënia e Kabulit, çështje ditësh
• Vazhdojnë luftimet në Afganistan, talebanët marrin qytetin e pestë pas një sërë ofensivash