Gazetari afgan: Qasja e re e talebanëve, strategji për të shtrirë influencën e tyre

Situata në Afganistan sa vjen e vështirësohet. Në një intervistë për Euronews, gazetari afgan, Fazelminallah Qazizai thotë se qasja e re e talebanëve është vetëm një strategji për të shtrirë influencën e tyre.

“Që në fillim kur talebanët hynë në Kabul, njerëzit i kapi paniku, por gradualisht situata u normalizua. Talebanët u treguan miqësorë me të gjithë”, u shpreh ai.

Sipas tij, kjo është strategjia e re e talebanëve, që të mos ngacmojnë popullsinë, një pjesë e të cilës i ka mirëpritur ata.

“Njerëzit pozuan me ta, biseduan me ta, u përpoqën të bënin shaka dhe selfie. Mendoj se kjo është strategjia e re e talebanëve për të mos ngacmuar dhe shqetësuar njerëzit. Një çështje që ka të bëjë me filozofinë e tyre”, tha ai më tej.

Ekonomia është një tjetër problem për Afganistanin, ku ndikimi i dollarit është i lartë.

“Kur bankat janë të mbyllur kuota e këmbimit të dollarit është e lartë. Aktualisht një dollar është i barabartë me mbi 90 afa dhe kjo ka një impakt tek ushqimi, benzina, nafta, etj”, u shpreh ai.

Gazetari thotë se kjo ka një ndikim negativ edhe në aspektin psikologjik dhe në atë praktik të jetës së afganëve.

“Kur talebanët erdhën me strategjinë e tyre të re, ky ishte një lajm i mrekullueshëm për ne dhe për gjithë botën. Por nuk besoj se kjo strategji do të zbatohet. Nëse do të aplikohet për një periudhë afatgjatë, do të jetë mirë. Por nëse është vetëm një teknikë për të bërë për vete mendjet dhe zemrat e afganëve dhe pasi të stabilizohen ata do të ndryshojnë, atëherë ky do të jetë një kthim pas. Kështu e shoh unë”, tregoi ai.

Në konferencën e parë për shtyp pas marrjes së Kabulit, luftëtarët premtuan se nuk do të përndiqnin armiqtë e vjetër dhe bashkëpunëtorët e aleatëve.

Por, afganët e shohin me skepticizëm këtë premtim. Këtë e tregon dhe numri i lartë i atyre që duan të lënë vendin, që janë mbledhur në aeroportin e Kabulit.

LEXONI GJITHASHTU:

• Sanksione për talebanët, SHBA ngrin 9.5 mld dollarë asete
• A po e dëmton imazhin e Joe Biden tërheqja e trupave amerikane nga Afganistani?
• Si përfundoi misioni i SHBA në Afganistan 20 vite pas rrëzimit të Talebanëve?