Britania e Madhe në bisedime me talebanët për të vijuar evakuimet nga Afganistani

Mbretëria e Bashkuar është në bisedime me talebanët për të siguruar kalim të sigurt për shtetasit britanikë dhe afganët që mbeten në Afganistan.

Një zëdhënës i qeverisë, konfirmoi se Përfaqësuesi Special i kryeministrit për Tranzicionin Afgan, Simon Gass, ka udhëtuar në Doha dhe po takohet me përfaqësuesit e lartë talebanë për të nënvizuar rëndësinë e kalimit të sigurt nga Afganistani për shtetasit britanikë dhe ata afganë që kanë kanë punuar me europianët gjatë 20 viteve të fundit.

Simon Gass është një diplomat i lartë, i cili më parë ka shërbyer si ambasador i Mbretërisë së Bashkuar në Greqi, Iran dhe si përfaqësues i lartë civil i NATO -s në Afganistan.

Ai aktualisht kryeson Komitetin e Përbashkët të Inteligjencës në Mbretërinë e Bashkuar, i cili i siguron qeverisë vlerësime të inteligjencës mbi sigurinë, mbrojtjen dhe çështjet e jashtme.

Sekretari i Jashtëm, Dominic Raab i tha “Sky News” të hënën se Britania e Madhe evakuoi më shumë se 17.000 njerëz nga Afganistani para se SHBA, e cila kontrollonte aeroportin e Kabulit, të tërhiqte trupat e saj të hënën.

Ai tha gjithashtu se një numër britanikësh, nuk ishin evakuuar ende, dhe pranoi se do të ishte një sfidë për t’i shpërngulur ata.

Britania e Madhe i bëri thirrje SHBA-së për të mbajtur kontrollin e aeroportit të Kabulit pas afatit të 31 gushtit dhe në fillim të kësaj jave, paraqiti një mocion të përbashkët me Francën në Këshillin e Sigurimit të OKB-së për të krijuar një “zonë të sigurt” në aeroport për të vazhduar evakuimet.

Sidoqoftë, rezoluta e miratuar nga OKB-ja ishte shumë më pak ambicioze, pasu u theksua se Këshilli i Sigurimit pret që talebanët të lejojnë “largimin e sigurt dhe të rregullt të afganëve dhe të gjithë shtetasve të huaj”.

LEXONI GJITHASHTU:

• Biden: Tërheqja nga Afganistani, vendimi më i mirë për SHBA
• Ish-presidenti Donald Trump paralajmëron talebanët
• Talebanët: Uashingtoni duhet të zgjidhte dialogun, jo arrogancën