Shtrenjtohet çmimi i mishit, qumështit e kafesë, inflacioni arrin 2,4% në gusht

Një sërë produktesh të shportës ushqimore janë shtrenjtuar në muajin gusht. Kjo rritje çmimesh është parë te mishi, bulmetet, vezët dhe fruta-perimet.

Çmimi i mishit është rritur me rreth 50 lekë në market, ndërsa rritja është reflektuar edhe në restorante. Qumështi i ambalazhuar dhe nënproduktet e tij janë rritur me 10 lekë. Rimëkëmbja e ekonomisë nga pandemia ka sjellë këtë situatë, e cila konfirmohet edhe në statistikat e INSTAT, me inflacionin që arriti 2.4%, në nivelet më të larta që janari i vitit 2017. Në të dhënat e INSTAT, shihet se rritja e çmimeve në gusht ka prekur edhe grup-mallra të tjerë, që nga duhani, karburantet në transport, veshjet e deri tek mobiliet dhe pajisjet elektrike të shtëpisë.

Edhe një drekë në restorant apo kafja e përditshme sot është bërë më e shtrenjtë. Shtrenjtimi në tregjet ndërkombëtare ka detyruar menaxherët e lokaleve të rrisin me rreth 40% çmimin e kafesë. E njëjta gjë ka ndodhur edhe me miellin, duke sjellë në shtator rritje të çmimit të bukës ne disa furra, çka pritet të godasë xhepat e qytetarëve nëse nuk rishikohet vendimi për rritjen e pagave e pensioneve.

LEXONI GJITHASHTU:

• Rindërtimi pas tërmetit, rriten çmimet e materialeve të ndërtimit, në rrezik cilësia e punimeve  
• Ekspertët rendisin arsyet pse çmimet e apartamenteve në Tiranë janë kaq të shtrenjta