Ish-presidenti afgan kërkon falje për ikjen nga vendi para mësymjes së talebanëve

Ish -presidenti afgan Ashraf Ghani i ka kërkuar sot falje qytetarëve të Afganistanit pasi u largua nga vendi për t’u strehuar në Emiratet e Bashkuara Arabe pak para se talebanët të mësynin Kabulin.

Ghani u largua në momentet kur talebanët kishin marrë nën kontroll të gjitha krahinat e vendit.

“Largimi nga Kabuli ishte vendimi më i vështirë i jetës sime,” u shpreh 72-vjecari, duke shtuar se i vinte keq që “nuk mundi të bënte diçka ndryshe”.

Ghani nënvizoi se nuk kishte ndërmend të braktiste njerëzit e tij, por “kjo ishte mënyra e vetme që të shmangte dhunën dhe luftën civile të ngjashme me atë të viteve 90-të”.

“Ndiej keqardhje të thellë që kapitulli im përfundoi në tragjedi të ngjashme me paraardhësit e mi,” – tha 72-vjeçari teksa nënvizoi se gjatë dy dekadave të fundit kishte bërë të pamundurën për t’i garantuar Afganistanit një sistem demokratik dhe të pavarur.

Gjatë deklaratës të bërë përmes një video-komunikimi në Facebook, ish-Presidenti mohoi akuzat se kishte udhëtuar në Emirate me rreth 169 milionë dollarë.

LEXONI GJITHASHTU:

• Presidenti afgan ndodhet në Emiratet e Bashkuara Arabe
• Sundimi i talebanëve nuk do të zgjasë shumë, thotë presidenti i vetëshpallur i Afganistanit