Aksident i rëndë në Kinë, furgoni përplaset me kamionin! Humbasin jetën 13 pasagjerë

Një furgon u përplas me një kamion në Kinën qendrore të enjten, duke vrarë 13 persona dhe duke plagosur tre të tjerë, tha policia.

Furgoni, i cili kishte një kapacitet maksimal prej nëntë pasagjerësh, por mbante 16, goditi pjesën e pasme të kamionit ndërsa ishte në një autostradë në provincën Henan në orën 2:40 të mëngjesit, tha zyra e menaxhimit të trafikut e Ministrisë së Sigurisë Publike të Kinës në mediat sociale.

Ai po ecte në autostradën G40 në qytetin Nanyang kur “përplasi nga mbrapa një kamion gjysmërimorkio që udhëtonte përpara tij”, tha zyra në platformën sociale Weibo.

Ministria tha se i “i kushtonte rëndësi të madhe” incidentit, “duke dërguar menjëherë një grup pune në Nanyang të udhëhequr nga një zyrtar i byrosë së menaxhimit të trafikut për të drejtuar hetimin”.

Në nëntor të vitit të kaluar, një tren u përplas me një grup punëtorësh hekurudhorë , duke vrarë 11 dhe duke plagosur dy në qytetin jugperëndimor të Kinës, Kunming, aksidenti hekurudhor më vdekjeprurës në më shumë se një dekadë.

Në qershor të atij viti, një person vdiq dhe katër të tjerë u plagosën në Chongqing kur një shofer dyshohet se u përplas me makinën në një turmë, pasi kalimtarët thuhet se e kritikuan atë për t’i rënë vazhdimisht borisë së makinës së tij.