Arrestohet polici i përfshirë në vdekjen e afro amerikanit

Polici i shkarkuar, Derek Chauvin është akuzuar për vrasje të shkallës së tretë, për rastin e George Floyd, tha pasditen e së premtes Prokurori i Qarkut Hennepin, Mike Freeman.

Rasti i George Floyd shkaktoi zemërimin e shumë qytetarëve në mbarë vendin, për faktin se ndërsa ai kishte vështirësi në frymëmarrje, një polic i bardhë e mbante të bllokuar me gjurin në qafë. Familja e të ndjerit ka kërkuar që 4 agjentët e policisë të përfshirë në vdekjen e tij të akuzohen për vrasje.

Gjatë konferencës për shtyp, Prokurori tha se janë akoma në fazën e rishikimit të provave dhe se në orët në vijim akuzat mund të shtohen. Nën hetim janë marrë edhe tre oficerët e tjerë të pushuar nga puna.

Incidenti ka rritur irritimin e komunitetit afro-amerikan ndaj policisë që vret njerëzit me ngjyrë, përfshirë këtu rastin e shtetases Breona Taylor në Kentaki.

Protesta janë zhvilluar gjithashtu në New York,  Çikago, Los Anxheles dhe Memfis. Në Ohajo, policia përdori spraj djegës për të shpërndarë manifestuesit.

Sidoqoftë situata më e rëndë u verifikua në Mineapolis, ku policia përdori gaz lotsjellës dhe plumba gome në përpjekje për të shpërndarë turmën e mbledhur jashtë komisariatit numër 3 të qytetit, i cili u përfshi nga flakët.