Arrihet marrëveshja për Brexit, Johnson: Më e mira për ne

Bashkimi Evropian dhe Britania e Madhe arritën më në fund marrëveshjen për Breksit, e cila kishte mbetur e bllokuar tek çështja e peshkimit dhe rregullat e ardhshme tregtare. Kryeministri Boris Johnson njoftoi arritjen e akordit, që e cilësoi “marrëveshjen më të madhe tregtare” të arritur ndonjëherë me Bashkimin Evropian. Ai tha se Britania ka arritur të rimarrë në duart e saj kontrollin e ligjit, kufijve dhe ujërave të peshkimit.

“Kemi arritur marrëveshjen më të madhe tregtare deri më sot, me vlerë 660 miliardë paund në vit. Është një marrëveshje gjithëpërfshirëse për tregtinë e lirë, sipas stilit kanadez, që do të mbrojë vendet e punës në vendin tonë dhe që do të lejojë shitjen e mallrave tona pa tarifa në tregun e BE-së”, tha Johnson.

Arritja e paktit tregtar u përshëndet në një konferencë shtypi edhe nga presidentja e Komisionit Evropian, Ursula von der Leyen, e cila e vlerësoi atë si një marrëveshje “të drejtë dhe të balancuar”.

“Më në fund kemi një marrëveshje. Ishte një rrugë e gjatë dhe e vështirë, por arritëm të gjenim një zgjidhje që ia vlente. Ishte e drejtë, e balancuar dhe gjëja e duhur e më e përgjegjshme për të dyja palët. Negociatat ishin të vështira. Shumë gjëra ishin në rrezik për shumë njerëz, ndaj ishte një akord për të cilin na u desh të luftonim”, deklaroi presidentja e KE.

Marrëveshja u arrit vetëm 7 ditë para se Mbretëria e Bashkuar të dilte nga një prej blloqeve më të mëdha tregtare në botë, lëvizja më domethënëse në gjeopolitikën globale që nga rënia e mbretërisë.