Artisti francez i ‘heq’ fasadën pallatit antik në Romë

Artisti francez, JR krijoi këtë javë një instalacion mural artistik për të befasuar kalimtarët në Romë, duke zgjedhur godinën e ambasadës franceze në kryeqytetin italian.

Pallati ‘Farnese’, prej kohësh seli e fytyrës diplomatike të qeverisë franceze në Itali, është ndërtuar në shekullin e gjashtëmbëdhjetë, me dëshirën e kardinalit Alessandro Farnese, që më vonë u bë Papa Pali i Tretë.

Ai ngrihet në sheshin Farnese, në qendër të Romës.

Instalacioni artistik u ofron njerëzve një pamje të asaj se si do të dukej ndërtesa nëse fasada e saj do të ishte e hequr.

“Pallati ‘Farnese’, një nga godinat më të famshme të Romës, nuk është i hapur për këdo dhe brenda tij janë disa dhoma që nuk mund të vizitohen. Kjo është një mënyrë për ta hapur pallatin për këdo, për t’u treguar njerëzve dhomat që mund të shihen vetëm në libra ose në internet. Kjo për mua është një formë arti në njëfarë rrethane”, shprehet artisti.

JR ka realizuar disa projekte të ngjashme, përfshirë një mural në Pallatin ‘Strozzi’, në Firence.

LEXONI GJITHASHTU:

• Piktura e artistit Leonardo Da Vinçi në ankand për 16.7 milionë dollarë
• Iluzion optik në Paris, artisti i njohur krijon një humnerë poshtë kullës Eiffel