‘AstraZeneca’ dhe tromboza, EMA e pranon: Ekziston lidhja mes vaksinës dhe mpiksjes së gjakut

Franca dhe vende të tjera evropiane po përpiqen të përshpejtojnë programet e vaksinimit duke hapur qendra për injektimin në masë.

Në rrethinat e Parisit, stadiumi kombëtar është kthyer në një “vaksinodrom”, në mënyrë që të kryejë deri në 10 mijë injektime në javë.

Ndërkohë, në prag të një takimi të rëndësishëm, kreu i strategjisë së vaksinimit pranë Agjencisë Evropiane të Barnave ka deklaruar se ekziston një lidhje mes vaksinës së prodhuar nga “AstraZeneca” dhe një reaksioni të rrallë të gjakut që shkakton mpiksjen.

Në një intervistë për një gazetë italiane, Marco Cavaleri tha se shkaku i lidhjes është ende i panjohur.

Agjencia Evropiane e Barnave, EMA, ka deklaruar se “AstraZeneca” është e sigurt për përdorim dhe se përfitimet prej saj janë më të mëdha se rreziku i ulët i efekteve anësore.

Sidoqoftë, pavarësisht garancive të ofruara, vende të ndryshme evropiane kanë pezulluar përdorimin e saj për personat nën 60 vjeç.