Atentat këshilltarit të presidentit të Ukrainës, Zelensky: Nuk na trembin dot

Këshilltari kryesor i presidentit ukrainas u bë të mërkurën objekt i një atentati që synonte eliminimin e tij. Serhiy Shefir i mbijetoi sulmit, por shoferi i tij mbeti i plagosur nga 10 plumbat e qëlluar.

Presidenti Volodymyr Zelensky reagoi menjëherë nga Nju Jorku, ku ndodhet për Asamblenë e Përgjithshme të OKB-së.

“Ajo që ndodhi nuk do të prekë forcën e ekipit tonë dhe as kursin që ne kemi zgjedhur drejt ndryshimit, drejt pastrimit të ekonomisë sonë, drejt luftës ndaj kriminalitetit dhe grupeve të mëdha e influente financiare. Kjo nuk do të ndodhë kurrë”, tha presidenti i Ukrainës.

Ndërkohë, zëdhënësi i Kremlinit, Dmitry Peskov mohoi përfshirjen e Rusisë. “Për fat të keq, për çdo gjë që ndodh sot në Ukrainë, politikanët vendas nuk mund të qëndrojnë pa fajësuar Rusisë. Natyrisht, kjo nuk ka lidhje me realitetin, por janë shenja të një ekzaltimi emocional”, tha Peskov.

Reagimi erdhi pasi më herët, kryetari i partisë politike të presidentit ukrainas deklaroi se pas atentatit mund të fshihet Rusia, ndërsa Zelensky shtoi se sulmi mund të jetë një mesazh drejtuar vetë atij.