Bayern prezanton Sane, 24-vjeçari nënshkruan për 5 sezone: Dua të fitoj Champions League

Leroi Sane u prezantua këtë të premte si lojtari më i ri i Bajernit të Mynihut. 24-vjeçari rikthehet në Gjermani pas 4 sezonesh tek skuadra e Manchester City. Në fjalët e tij të para pas prezantimit, Sane ka deklaruar se objektivi kryesor për të është fitimi i Ligës së Kampioneve, një trofe që atij i ka munguar.

“Bayern është një klub i madh me objektiva madhore. Ishte zgjedhja e parë për mua. Dua të fitoj sa më shumë trofe këtu, por mbi të gjitha dëshiroj që të fitoj Champions League, pasi nuk e kam fituar më parë. Champions League është një ëndërr për këdo”, tha Sane.

Edhe shefi i klubit të Bayern, Karl-Heinz Rummenigge, u shpreh mjaft i lumtur që lojtari i Kombëtares së Gjermanisë është bashkuar ta, duke e cilësuar si një prej më të mirëve anësorin. 

“Qëllimi ynë është që të marrim lojtarët më të mirë dhe mund të them se kemi një xhevahir tjetër në klub. I dimë aftësitë e tij, pasi e kemi parë në fushë, shpresojmë që të përshtatet shpejt”, u shpreh Rummenigge

Pavarësisht se klubi nuk i ka zbuluar shifrat e transferimit, mediat gjermane kanë mësuar se Sane u ka kushtuar 45 milionë euro kampionëve të Gjermanisë.