BE, akuza Amazon-it. Gjiganti i shitjeve online akuzohet për shkelje të ligjve të konkurrencës

Gjiganti i internetit, Amazon, që u shet çdo ditë miliona klientëve, akuzohet se përdor të dhënat e kompanive që supozohet t’i ndihmojë për të favorizuar produktet e tij.

Kështu thuhet në akuzën e bërë nga Komisioni Evropian ndaj kompanisë së Jeff Bezos.

“Në mënyrë të paligjshme, Amazon ka shtrembëruar konkurrencën e tregjeve online. Komisioni ka vendosur të hapë një hetim të dytë mbi praktikat e biznesit të Amazon, pasi kemi arritur në përfundimin paraprak se kompania ka abuzuar me pozicionin e saj dominant në shtete si Gjermania dhe Franca, që janë dhe tregjet më të mëdha të Amazon në Bashkimin Evropian”, ka deklaruar Margaret Vestager, zyrtare e Komisionit Evropian.

Një përfaqësues i Amazon, i kontaktuar nga Euronews refuzoi të bënte komente, por për sindikatat njoftimi i KE është pritur prej kohësh.

“Ne e mirëpresim. Në fakt, është diçka të cilën e kemi pritur prej kohësh. Kur shohim provat e pastra që ne kemi për sjelljen monopoliste të Amazon, atëherë mendojmë se duhet me të vërtetë ndërhyrja e Komisionit”, ka deklaruar Oliver Roethig, sekretar rajonal për Europën i “UNI Global Union”.

Kjo nuk është hera e parë që Amazon ndodhet në këtë pozitë. Më herët gjatë vitit ajo u akuzua se spiunonte punonjësit e saj për të mbajtur nën kontroll monopolin.

Edhe në Shtetet e Bashkuara, jo vetëm në BE, veprimtaria e gjerë e saj po i kthehet kundër pasi Kongresi filloi hetimin, bashkë me kompanitë e tjera të mëdha të teknologjisë si Apple dhe Google, për mënyrën se si veprojnë në botën e ekonomisë digjitale.

Për momentin, akuzat ndaj Amazon janë vetëm një njoftim, por ato mund të sjellin një ndryshim në llojin e tregtisë online në Evropë.