BE, dakord me Izraelin dhe Egjiptin për t’u shkëputur nga gazi rus

Egjipti, Izraeli dhe Bashkimi Evropian nënshkruan të mërkurën një marrëveshje për rritjen e shitjeve të gazit të lëngshëm drejt vendeve të Unionit, në përpjekje për të reduktuar vartësinë nga Rusia, teksa lufta në Ukrainë vazhdon.

“Dihet që lufta e Rusisë kundër Ukrainës ka ekspozuar vartësinë tonë ndaj karburanteve fosile ruse. Ne duam ta asgjësojmë këtë vartësi. Duam të kalojmë tek furnizues të besueshëm dhe Egjipti është një partner i tillë”, tha presidentja e Komisionit Europian, Ursula von der Leyen.

“Diskutimi ynë sot është dëshmi e përpjekjeve për të forcuar bashkëpunimin mes Egjiptit dhe Bashkimit Evropian në fushën e energjisë, përmes gazit natyror ose rrjeteve energjetike. Kemi rënë dakord të vendosim themelet e një partneriteti strategjik në këtë fushë jetike, për të pasur zhvillim në të ardhmen”, u shpreh Abdel Fatah al Sisi, president i Egjiptit.

Në bazë të marrëveshjes, Bashkimi Evropian do të ndihmojë Egjiptin dhe Izraelin të rrisin prodhimin dhe eksplorimin e gazit në ujërat territoriale përkatëse. Sidoqoftë, ende nuk është e qartë sasia që Unioni do të importojë nga secili vend.

LEXONI GJITHASHTU

• Rama-Abazoviç në Kiev, takim me Zelenskin dhe vizitë në zonat e bombarduara
• Rama dhe Abazoviç nisen drejt Kievit