BE do bisedojë me talebanët, por nuk do ta njohë qeverinë, deklaron Borrell

Ministrat e Jashtëm të Bashkimit Europian kanë rënë dakord mbi nevojën për t’u angazhuar me talebanët, por pa njohur qeverinë e re.

Gjatë një mbledhjeje në Slloveni, kreu i diplomacisë së unionit Josep Borrell tha se në këtë moment  është e nevojshme të rivendoset prezenca në Afganistan.

“Në mënyrë që të mbështesim popullsinë afgane, do të duhet të angazhohemi me qeverinë e re në Afganistan, gjë e cila nuk do të thotë njohje, por një angazhim operacional”, iu tha Borrell gazetarëve të premten.

Sipas BE, bashkëpunimi mund të vijë vetëm nëse talebanët plotësojnë 5 kushte, përfshi të parandalojnë eksportimin e terrorizmit, respektimin e të drejtave të njeriut, krijimin e një qeverie gjithëpërfshirëse, lejimin e hyrjes së ndihmave humanitare si dhe të lejojnë qytetarët afganë e europianë që duan të largohen nga vendi.

Kur grupi islamik konservator mori pushtetin muajin e shkuar, BE dhe shumë shtete të tjera perëndimore vendosën të tërheqin ambasadat nga Afganistani, duke kufizuar kështu ndikimin e tyre tek administrata e re.

Por tanimë, Brukseli duket se ka ndryshuar linjë, teksa mbetet i kujdesshëm në njohjen zyrtare të talebanëve si dhe se sa e besueshme mund të jetë qeveria e re.

Por nga ana tjetër po përpiqet edhe të shmangë një tjetër fluks masiv emigrantësh që me shumë gjasë mund të shfaqet e të trokasë në dyert e unionit.

LEXONI GJITHASHTU:

• Jeta e re në Afganistan, ardhja e talebanëve rrit kërkesën për burka
• Evropa dështoi në evakuimin e refugjatëve nga Afganistani, thonë zyrtarë të BE-së
• Ekonomi e rraskapitur në Afganistan, rritje e çmimeve dhe zhvlerësim i valutës