BE kërkon bashkëpunimin e Kroacisë pas pretendimeve për abuzime me emigrantët në kufi

Brukseli i ka bërë thirrje Kroacisë që të bashkëpunojë pas disa pretendimeve se ka pasur abuzime  dhe dhunë kundër emigrantëve në kufirin me Bosnjën dhe Hercegovinën.

Lajmi vjen pasi një deputet i Parlamentit Europian ka akuzuar Bashkimin Europian se vazhdon t’i japë fonde Zagrebit për sigurinë e kufijve edhe pasi kanë qenë të vetëdijshëm për akuzat për abuzime.

“Organizatat e shoqërisë civile vijojnë të monitorojnë dhe dorëzojnë raporte të instancave të dhunës serioze ndaj emigrantëve të kapur në kufi, gjë e cila është shumë shqetësuese. E di që ju ndani të njëjtin shqetësim për këto raporte të prezantuara si prova materiale, dhe jam e vetëdijshme se jeni në punë e sipër për të vendosur masa përkatëse në mënyrë që  të respektohen të drejtat themelore të emigrantëve dhe azilkërkuesve”, thuhej në letrën drejtuar ministrit të Brendshëm, Davor Božinović, nga Komisionerja e BE për Çështjet e Brendshme, Ylva  Johansson. 

The @EUombudsman inquiry follows a complaint brought by @AmnestyEU, building on years of work by us and others in documenting these horrific abuses.

We are committed to ensuring responsible, accountable & rights compliant EU border management. https://t.co/cQcZtcNUOQ

— Eve Geddie (@evegeddie) November 10, 2020

Ndërsa Zyra e Avokatit Europian të Popullit njoftoi se kanë nisur hetimet pas raportimeve të Amnesty International të cilët pretendojnë që emigrantët janë dhunuar, rrahur dhe sulmuar seksualisht teksa përpiqeshin të kalonin në Kroaci.

Atyre u janë shkatërruar celularët, u janë marrë sendet personale dhe janë detyruar të ecin në borë për orë të tëra, thotë Amnesty International.

Raportime të ngjashme ka pasur edhe në vende si Hungaria, Rumania dhe Greqia. E njohur si “Rruga Ballkanike”, emigrantët përpiqen të kalojnë përmes Kroacisë, Bosnjës dhe Hercegovinës dhe Serbisë në mënyrë që të kërkojnë azil në Bashkimin Europian.