Ben Gvir: Irani duhet luftuar ashtu siç SHBA-të luftuan nazistët

Ministri izraelit i Sigurisë Kombëtare, Itamar Ben Gvir, iu përgjigj sot kritikave të Zëvendëspresidentit të Shteteve të Bashkuara të Amerikës, JD Vance, për kundërshtimin e memorandumit të mirëkuptimit midis Uashingtonit dhe Teheranit, duke thënë se Irani duhet të luftohet “ashtu siç Shtetet e Bashkuara të Amerikës luftuan nazistët në Luftën e Dytë Botërore”.

Në një intervistë me The New York Times të botuar më herët sot, Vance kritikoi Ben Gvir dhe Ministrin izraelit të Financave, Bezalel Smotrich, për sulmet e tyre ndaj memorandumit të mirëkuptimit SHBA-Iran.

“Ju patë njerëz në establishmentin izraelit, Itamar Ben Gvir dhe Bezalel Smotrich, duke kritikuar marrëveshjen. Përgjigja ime ndaj tyre do të ishte: Cili është saktësisht propozimi juaj? Ju jeni një vend me nëntë milionë banorë. Nuk mund t’i shmangeni me vdekje çdo problemi sigurie me të cilin përballeni”, tha Vance.

Ben Gwire u përgjigj më pas në rrjetin social X, në një postim në anglisht drejtuar zv/presidentit amerikan, se “nazistët e shekullit të 21-të duhet të trajtohen në të njëjtën mënyrë siç Shtetet e Bashkuara të Amerikës i trajtuan nazistët e shekullit të 20-të”.

Ben Gvir dhe Smotrich, udhëheqës të partive të ekstremit të djathtë në koalicionin qeverisës të Izraelit, janë ndër kritikët më të ashpër të marrëveshjes SHBA-Iran , duke argumentuar se ajo nuk ofron garanci të mjaftueshme se Teherani nuk do të përbëjë një kërcënim sigurie për Izraelin në të ardhmen.