Besimi i ulët i biznesit tkurr investimet e huaja, thotë eksperti

Eksperti i ekonomisë Adrian Civici thotë se besimi i ulët i të bërit biznes në Shqipëri mund të tkurrë investimet dhe frenojë sipërmarrjet e huaja për t’u shtrirë me aktivitet në vendin tonë.

Dhoma Amerikane e Tregtisë tha në një raport se klima e biznesit në Shqipëri është në nivelin më të ulët që nga viti 2012.

Duke komentuar për Euronews Albania këtë përfundim, Civici tha se kjo nuk është hera e parë që raportohet kjo gjendje. Ai tha se edhe dhoma të tjera të tregtisë, apo dhe institucione ndërkombëtare e kanë nxjerrë në pah këtë problem.

Civici argumentoi se në përgjithësi rënia e treguesve të besimit të biznesit pritej si rrjedhojë e ndikimit që la në ekonomi tërmeti i vitit 2019 dhe pandemia. Por sidoqoftë ai përmendi si faktorë të vazhdueshëm që ndikojnë si: korrupsioni, informaliteti, marrëdhëniet me bankat, kapitali njerëzor, qëndrueshmëria e punësimit, fuqia punëtore, por dhe sistemi i drejtësisë.

“Ekonomia më shumë se gjithçka është besim, pastaj para, financim dhe nëse mungon klima e besimit ka një tkurrje të bizneseve për të zgjeruar aktivitetin e tyre, për të hapur aktivitete të reja, apo për të shtuar bashkëpunimin,” – tha Civici.

“Biznesi ose frenohet të investojë, ose duhet të pranojë një kosto investimi me nivel më të lartë risku,” – vijoi ai.

Sidoqoftë eksperti i ekonomisë këmbënguli se nga raportet si ky i Dhomës Amerikane të Tregtisë është thelbësore që të reagohet me politika të mira ekonomike dhe jo të kalohet rëndomë si çështje për kapital politik.

LEXONI GJITHASHTU:

• Dhoma Amerikane e Tregtisë thotë se ka rënë besimi ndaj biznesit në Shqipëri