Presidenti amerikan, Joe Biden po shqyrton vendosjen e taksave të reja ndaj fitimeve rekord të komanive të naftës, duke i akuzuar ato për “përfitim nga lufta”.

Kreu i shtetit kërkon që kompanitë e në fjalë të ndihmojnë konsumatorët amerikanë pasi raportuan fitime marramendëse nga korriku në shtator.

“Përfitimet rekord të kompanive të naftës nuk vijnë sepse ato po bëjnë diçka të re apo inovative. Ato vijnë si pasojë e luftës. Luftës brutale që po shkatërron Ukrainën dhe po dëmton miliona njerëz në mbarë globin.

Në vend që të rrisin investimet në Amerikë apo t’u ofrojnë lehtësim konsumatorëve, përfitimet e tepërta po shkojnë tek aksionerët, të cilët po blejnë sërish aksionet e tyre, në mënyrë që pagat e drejtuesve të prekin qiellin. Ndaloni me kaq. Mjaft është mjaft”, tha Biden.

Sikurse qytetarët evropianë, edhe amerikanët po përballen me rritjen e çmimeve, por ai i karburanteve përbën një nga çështjet kryesore për votuesit në prag të zgjedhjeve të mesmandatit.

Një taksë e re mbi naftën dhe gazin ka pak gjasa të kalojë në Kongres, por thirrja e Biden për vendosjen e saj mund të rrisë shanset e demokratëve në zgjedhjet e javës së ardhshme.

LEXONI GJITHASHTU

• Aleanca BE-SHBA në rrezik, Franca dhe Gjermania paralajmërojnë Biden
• SHBA-Rusia po flasin sërish pas muajsh të tërë – por për çfarë dhe pse kaq shpesh?
• Lufta e vërtetë me Kinën sapo ka filluar