Biden kundër armëve, presidenti prezanton masat, por efikasiteti i tyre në dyshim

Presidenti amerikan Joe Biden njoftoi të enjten një seri masash të kufizuara për të frenuar dhunën e armëve në Shtetet e Bashkuara, në atë që Shtëpia e Bardhë e quajti hapin e parë drejt parandalimit të të shtënave në masë dhe vetëvrasjeve.

Masat e reja përfshijnë plane për Departamentin e Drejtësisë që të gjurmojë dhe ndalojë armët artizanale dhe t’i bëjë pajisjet që e kthejnë një pistoletë në armë automatike subjekte të regjistrimit në Aktin Kombëtar të Armatimit.

Biden tha gjithashtu se do t’i kërkojë Agjencisë Federale kundër Alkoolit, Duhanit, Armëve dhe Eksplozivit të bëjë një raport mbi trafikimin e armëve në Shtetet e Bashkuara dhe ta bëjë më të lehtë për shtetet që të miratojnë ligje që ndalojnë armatimet e personave që përbëjnë rrezikshmëri.

“Dhuna e armëve është një epidemi. Po e them edhe një herë. Është një epidemi dhe është një turp ndërkombëtar për vendin tonë”, u shpreh Joe Biden, president i Shteteve të Bashkuara.

Biden, një demokrat që ka pas një histori të gjatë përpjekjesh për kontrollin e armëve, është ndodhur nën presion për të vepruar pas masakrave të fundit në Kolorado dhe Xhorxhia.

Sidoqoftë, masat e prezantuara prej tij nuk përmbushin premtimet e tij elektorale dhe nuk janë legjislative. Shtëpia e Bardhë ka deklaruar se presidenti do të vazhdojë të nxisë Kongresin për të ndërmarrë hapa më agresivë.

Nga ana tjetër, kontrolli i armëve është një çështje që ka përçarë Shtetet e Bashkuara, pavarësisht masakrave të shumta në shkolla dhe vende të tjera publike.