Biznesi i vogël ul qepenin, tregtarët kërkojnë shtyrjen e fiskalizimit

Biznesi i vogël në kryeqytet ka ulur qepenat për rreth 1 orë. Në tregun ushqimor, në hyrje të Kombinatit në Tiranë, në shenjë proteste, dhjetëra tregtarë kërkuan shtyrjen e procesit të fiskalizimit.

Sipas tyre, procesi është i kushtueshëm dhe duhet shtyrë të paktën për vitin tjetër. Vështirësia e të bërit biznes për ta, ka ardhur, pas pandemisë edhe nga mungesa e ndihmës nga ana e qeverisë.

Ndërkohë, tregtarët ankohen edhe për rritjen e çmimit të karburanteve dhe efektin zinxhir të rritjes së çmimeve për artikuj të tjerë.

Në këtë situatë, ata kanë parë rënie të fuqisë blerëse. Mbi këto argumente, ata kanë përforcuar nevojën e anulimit të fiskalizimit këtë vit. Fiskalizmi për biznesin e vogël dhe të mesëm ka nisur në shtator dhe si afat të fundit ka 31 dhjetorin.

Sipas përllogaritjeve që bën Shoqata e Biznesit të Vogël, që një biznes i vogël a i mesëm të pajiset me sistemin e ri fiskal, duhet të paguajë jo më pak se 1300 euro. Shoqata thotë se do kërkojë përshkallëzimin e protestës, në rast se nuk merr vëmendje nga qeveria.