Bllokimi i kanalit të Suezit, dështon operacioni i lirimit, kostoja 8.5 miliardë euro në ditë

Një përpjekje e nisur ditën e premte për të zhvendosur anijen me kontejnerë e bllokuar në Kanalin e Suezit ka dështuar.

Lajmin e konfirmoi kompania që kishte marrë përsipër operacionin, gjermania BSM, e cila deklaroi se një ekip shpëtimi nga Holanda dhe dy anije tërheqjeje do të mbërrijnë më 28 mars për të ndihmuar në zhvendosjen e objektit.

Sipas kompanisë, aktualisht fokusi është drejtuar tek heqja e rërës dhe baltës përreth anijes.

Si pasojë e bllokimit, anije të shumta me kontejnerë si në anën veriore ashtu dhe në atë jugore të kanalit u rreshtuan në radhë ditën e premte.

Impakti i bllokimit të Suezit tek tregtia globale pritet të jetë i madh, pasi çdo ditë në të kalojnë mallra me vlerë 8.5 miliardë euro. Gjithashtu, 10 për qind e tregtisë globale kalojnë përmes kanalit në fjalë, përfshirë 1.9 milionë fuçi naftë në ditë.

Edhe 10 për qind e gazit të lëngshëm që qarkullon nëpër botë kalon po ashtu përmes Suezit.

Hetimet paraprake tregojnë se mjeti lundrues u bllokua për shkak të erërave të forta dhe përjashtojnë ndonjë defekt mekanik.