Bllokimi i mediave sociale të SHBA-së, Rusia kërkon më shumë kontroll në veprimtarinë online

Parlamenti rus ka prezantuar një projekt-ligj, që nëse miratohet do t’i lejojë qeverisë të kufizojë veprimtarinë e mediave sociale të Shteteve të Bashkuara. Kjo pasi rrjetet sociale amerikane si Twitter apo Facebook kanë diskriminuar platformat mediatike të Rusisë.

Nismëtarët e projekt-ligjit kanë thënë se kjo veprimtari është ndërmarrë, pasi kanë marrë ankesa nga media vendase, të cilat janë shprehur se shumë nga faqet e tyre mediatike në disa rrjete sociale janë pezulluar ose janë etiketuar.

“Këta gjigandë kanë problem me klientët e tyre, aq sa edhe po i diskriminojnë ata. Le të merren ata me klientët e tyre, por për ne e rëndësishme është të mbrojmë veten nga këto diskriminime,” – tha Dmitry Peskov, zëdhënës i Kremlinit.

Twitteri është një prej rrjeteve sociale në Shtetet e Bashkuara të Amerikës që ka përdorur për shumë faqe mediatike ruse, përshkrimin etiketues “media të lidhura me shtetin”. Kjo e ka nxitur Rusinë të ndërmarrë hapat e prezantimit të këtij projekt-ligji.

Zëdhënësi i Kremlinit, Dmitry Peskov, është shprehur në lidhje me këtë situatë se “masat duhet të shqyrtohen me kujdes dhe se nevojitet një mekanizëm për të luftuar problemin”.  

Sipas projekt-ligjit të propozuar qeveria ruse do të ketë mundësinë të menaxhojë ato çka mediat lokale publikojnë, si dhe do të kenë autoritet të plotë ose pjesërisht në bllokimin e mediave sociale amerikane që kontrollojnë veprimtarinë e platformave të tyre.  

Shteti rus ka kohë që përpiqet të fitojë më shumë kontroll mbi veprimtarinë në internet. Kjo ka qenë e dukshme edhe në rastin e bllokimit të platformës së Linkedin-it në vitin 2015, pasi një gjykatë ruse konstatoi se përdorimi i tij shkelte ruajtjen e të dhënave personale të qytetarëve.