Bota do jetë ndryshe, si e pritën londinezët lajmin për vdekjen e mbretëreshës

Ndërsa fëmijët e saj mbërritën në Kështjellën Balmor për të qenë pranë shtratit të mbretëreshës, i gjithë kombi priti, duke u përgatitur për më të keqen, duke u lutur për më të mirën.

Turmat u mblodhën jashtë Pallatit Buckingham duke mos e besuar lajmin.

Siç e kërkon  tradita, pallati vendosi një njoftim jashtë portave që njoftonte vdekjen e mbretëreshës. Flamujt u ulën në gjysmështizë.

“Ne e ndjenim se kjo ditë do të vinte, dhe nuk do ta besonim. Unë isha këtu dhe qëndrova me fëmijët e mi, nuk e takova kurrë mbretëreshën, isha këtu në qershor për jubileun dhe e ndjeva se duhet të vija”, thotë John Harrison.

“Mendoj se vërtetë është një kohë reale tranzicioni. Jo vetëm një kryeministër i ri, por tani një monark i ri. Është një kohë tranzicioni për kombin”, shprehet Angus Kincaid.

Mbretëresha Elizabeta II është një ikonë e shekujve 20 dhe 21, monarku më jetëgjatë në Britani.

“Ajo ka mbetur konstante në zemrën dhe establishmentin e Mbretërisë së Bashkuar dhe i mënyrës së jetesës së Britanisë. Në një vend që ndonjëherë mund të duket përçarë, ajo mbeti jashtëzakonisht popullore si forcë bashkuese, një burim i besueshëm ngushëllimi në kohë të vështira dhe një mbretëreshë që mund të gjente pajtim në mosmarrëveshje”, thotë Luke Hanrahan.

“Bota do të jetë ndryshe, Commonwealth do të jetë ndryshe, bota anglishtfolëse do të jetë rrënjësisht e ndryshme –pothuajse çdo kryetar shteti, dëshiron të vijë dhe të shohë mbretëreshën për një arsye specifike: Sepse ajo i takoi të gjithëve”, u shpreh Chris Imafidon, ekspert mbretëror.

Një mbretërim i gjatë i karakterizuar nga një ndjenjë e fortë detyre. Një vendosmëri për t’ia kushtuar jetën fronit dhe popullit të saj. Kjo figurë duket se është e vështirë të përsëritet jo vetëm në historinë britanike.

LEXONI GJITHASHTU:

• Bust i mbretëreshës Elizabeth II në Has, Morina: Do financohet nga emigrantët
• Historia e vendit ku mbretëresha Elizabeth II kaloi fëmijërinë dhe ditët e fundit