Brazil, infektohet dhe presidenti Bolsonaro, kundërshtar i masave kundër virusit

Presidenti i Brazilit, i cili në fillim e quante pandeminë sajesë e më pas qortonte guvernatorët e shteteve që izolonin popullsinë, është infektuar edhe vetë me COVID-19.

Bolsonaroja e konfirmoi që është infektuar gjatë një interviste në televizion, ndërkohë që kjo ishte e disata herë që testohej.

Ai e ka kundërshtuar aq me forcë izolimin kundër COVID-19, sa jo vetëm që e quajti “grip të thjeshtë” në fillim, por bëri thirrje dhe që populli brazilian të armatosej si në SHBA.

“Është shumë e lehtë të vendosësh diktaturë në Brazil. Njerëzit janë në shtëpi. Prandaj dua që populli të armatoset, që të sigurohen se s’do të dalë ndonjë bir bushtre e të vendosë diktaturë këtu”, tha Bolsonaroja në mbledhjen e qeverisë.

Edhe kur vendi i tij u rendit i dyti më i prekur në botë, pas SHBA-ve, presidenti Bolsonaro vazhdoi me një qasje më të lehtë ndaj coronavirusit.

Ai vendosi veton për mbajtjen e maskave në kisha, shkolla, dyqane e fabrika. Veç kësaj, pengoi edhe detyrimin ligjor që i bënte bizneset të ofronin maska për stafin e tyre.

Duke ndjekur shembullin e Trump, Bolsonaroja gjithashtu qortoi OBSH-në e madje kërcënoi ta largonte Brazilin nga unioni.

“SHBA-të e braktisën OBSH-në. Po mendojmë ta bëjmë dhe ne në të ardhmen. Nëse OBSH nuk punon me paanshmëri ideologjike, ne mund të largohemi”, tha ai në javën e parë të qershorit.