Britania e Madhe kërcënon BE-në: Gati të prishim marrëveshjen e Brexit

Britania e Madhe pritet të kërcënojë së shpejti BE-në se do të devijojë nga marrëveshja e Brexit nëse unioni nuk tregon më shumë fleksibilitet në lidhje me kufirin e Irlandës së Veriut.

David Frost, ministri britanik që udhëheq negociatat e Brexit, po përgatitet të njoftojë së shpejti një ndryshim të protokollit, i cili mund të ketë pasoja serioze në marrëdhëniet me BE-në.

Sipas agjencisë së lajmeve “Reuters”, një seri planesh po ndërthuren në selinë qeveritare në “Downing Street”, me Frost që pritet të përditësojë Parlamentin ditën e mërkurë mbi këtë çështje dhe madje t’u paraqesë një dokument ligjvënësve mbi Brexit.

Për Frost, protokolli nuk është i përshtatshëm për palën britanike në formën aktuale të tij dhe nëse me Brukselin nuk mund të arrihet një marrëveshje, atëherë Londra do të shqyrtojë të gjitha opsionet, përfshirë ndërmarrjen e veprimeve të njëanshme.

“Të gjitha opsionet janë në tryezë. Ne e kemi thënë se në gjendjen aktuale protokolli nuk po funksionon, ndaj gjërat duhen ndryshuar”, ka thënë Frost.

Devijimi nga i ashtuquajturi “Protokolli i Irlandës së Veriut” është një hap i rrezikshëm, pasi në gjendjen aktuale ai synon të parandalojë prishjen e marrëveshjes delikate të paqes, e ndërmjetësuar nga Shtetet e Bashkuara në vitin 1998, e cila i dha fund dekadave me gjakderdhje.

Kryeministri Boris Johnson, që nënshkroi në vitin 2020 marrëveshjen e Brexit, ka mbetur i pakënaqur nga ky protokoll, që ka vendosur dokumentacione dhe kontrolle, që sipas Londrës zyrtare pengojnë që ushqimet britanike të shkojnë në Irlandën e Veriut.

LEXONI GJITHASHTU:

• Britania e Madhe lehtëson kufizimet teksa rriten rastet me variantin “Delta”
• Marrëdhëniet Gjermani-Britani, Merkel në Londër: Shans për një kapitull të ri pas Brexit
• 5 vjet nga Brexit: ‘Do t’ju merrnim mbrapsht’, thotë BE në sondazhin e ri