Britania e Madhe lehtëson kufizimet teksa rriten rastet me variantin “Delta”

Kryeministri Britanik, Boris Johnson bëri të ditur se do t’i jepej fund kufizimeve të COVID-19 në Angli në dy javët e ardhshme. Vendimi vjen në një kohë kur janë rritur ndjeshëm rastet me variantin “Delta”. Pjesa tjetër e Evropës është duke qëndruar në pritje, teksa Johnson pohoi se heqja e kufizimeve është një strategjie e rrezikshme por e nevojshme.

“Mund të kemi 50 mijë raste të reja ditore deri më datë 19 dhe siç e kishim parashikuar po shohim një rritje të numrit të të shtruarve nw spitale dhe do na duhet fatkeqësisht të përballemi me më shumë fatalitete nga COVID. Ka vetëm një arsye se përse ne nuk mund të tërhiqemi nga plani për rihapjen e plotë, ku normalisht do të duhej të rrisnim më tej kufizimet. Dhe kjo është për shkak të efektivitetit të vazhdueshëm të procesit të vaksinimit”, u shpreh kryeministri britanik.

Edhe Izraeli i ka vendosur të gjithë shpresat të vaksinimi i popullsisë, teksa janë shteti që ka vaksinuar pjesën më të madhe të popullsisë. Por kjo ishte përpara se të mbërrinte varianti “Delta”.

“Varianti ‘Delta’ ka ndryshuar dinamikën e infektimeve dhe transmetueshmërisë kudo në botë. Dimë edhe që ka një kapacitet më të lartë për ti bërë ballë sistemit imunitar, ndryshe nga varianti ‘Alfa’”, tha Ran Balicer, kryetar i komitetit të ekspertëve në Izrael.

Të dhënat tregojnë se vaksinat nuk kanë efektshmëri të lartë për të parandaluar simptomat e mesme, por ato mbrojnë mjaftueshëm në përkeqësimin e rëndë të shëndetit dhe humbjen e jetës. Kjo është arsyeja që në Francë, ku popullsia është skeptike mbi vaksinat, qeveria po hap kudo qendra vaksinimi, edhe në autobusë dhe qendra turistike.