Britania e Madhe në përpjekje për të siguruar mbështetje ushtarake për Ukrainën

Britania e Madhe po punon për një paketë mbështetjeje ushtarake dhe ndihmë ekonomike për Ukrainën ndërsa kërcënimi i një pushtimi rus rritet, tha një zëdhënës i qeverisë të dielën.

Këtë javë, kryeministri Boris Johnson do të bëjë një udhëtim në Evropë për të krijuar mbështetje. Zyra e tij tha se ai dëshironte të angazhohej më shumë me vendet nordike dhe baltike.

“Kriza në kufirin e Ukrainës ka arritur një pikë kritike. Të gjitha informacionet që ne kemi sugjerojnë se Rusia mund të ketë në planifikim një pushtimi të Ukrainës në çdo moment”, tha zëdhënësi.

Autoritetet amerikane dhe britanike kanë deklaruar se presidenti rus Vladimir Putin mund të urdhërojë një pushtim përpara përfundimit të Lojërave Olimpike Dimërore më 20 shkurt, në atë që do të ishte kriza më e madhe e sigurisë në Evropë për dekada.

Rusia, e cila ka më shumë se 100.000 trupa në kufirin ukrainas, ka mohuar akuzat. Kremlini ka akuzuar vendet perëndimore për përhapjen e gënjeshtrave për të hequr vëmendjen nga aktet e tyre agresive.