BSH: Bizneset janë optimistë, individët ndihen të pasigurt

Tremujori i fundit i vitit 2020 u shoqërua me një gjallërim të aktivitetit të bizneseve, çka reflektoi edhe përmirësim të besimit në ekonomi nga ana e tyre.  Sipas Bankës së Shqipërisë, treguesi i ndjesisë ekonomike u rrit me gjashtë pikë krahasuar me tremujorin e mëparshëm, por ky perceptim nuk u reflektua nga individët. 

Treguesi i besimit konsumator ra me 2 pikë përqindje gjatë periudhës tetor-dhjetor, ndërsa edhe pritjet e situatës së përgjithshme ekonomike dhe situatës financiare të familjeve, ranë me përkatësisht 1 dhe 0.4 pikë përqindje.

Situata e brishtë e ekonomisë, për shkak të pasigurisë nga Covid-19 dhe masat e përsëritura kufizuese, duket se nuk po ngjallin besim në familje. Tremujori i katërt 2020, nga ana tjetër pasqyroi edhe përmirësimin e besimit në tregti, industri dhe shërbime, ndërsa treguesi i besimit në ndërtim shënoi rënie të lehtë. Treguesi i besimit në sektorin e industrisë u rrit me 7.7 pikë përqindje gjatë tremujorit të katërt, falë rritjes së prodhimit, me 16.8 pikë përqindje dhe kontratave porositëse, me 12.5 pikë përqindje. 

Treguesi i besimit në sektorin e shërbimeve u rrit me 7.1 pikë përqindje, i mbështetur nga rritja paralele dy balancave formuese, ecuria e biznesit dhe kërkesa.