Buxheti 2021, eksperti i ekonomisë: E pamundur të realizohet, pas zgjedhjeve do të ketë ndryshime

Eksperti i ekonomisë dhe dekani i Fakultetit Ekonomik në Universitetin Luarasi, Mateo Spaho është shprehur për Good Morning Albanians se buxheti i vitit 2021 është një buxhet ëndërrimtar dhe e pamundur që të realizohet.

“Unë do të thosha një buxhet ëndërrimtar, është shumë pranë zeros, është përtej optimizmit, është e pamundur.

Kjo sepse të planifikosh pas një vit krize që të mbledhësh 30 ose 40 mld lekë më shumë të reja, është shumë optimiste dhe është një gjë pak e vështirë, se kemi edhe një fushatë elektorale përpara. Kjo do të bëhej nëse vendi do të kishte një rritje 7 deri në 8%.

Covid po vijon dhe me çfarë presim edhe pranvera e ardhshme do të jetë problematike”, u shpreh ai.

Eksperti theksoi se duke qenë në kohë pandemie, rritja e ekonomike vitin tjetër do të jetë më e ulët.

“Kam frikë se rritja e ekonomike vitin tjetër do të jetë më e ulët dhe nuk e dimë sesa do të vijojë kjo virozë.

Pasoja në ekonomi që kjo përmban edhe shifra 5% është mjaft optimiste. Duke marrë parasysh që të ardhurat nuk do të realizohen dhe që shpenzimet kanë më shumë siguri të realizohen, deficiti dhe borxhi publik do të rriten shumë më shumë”, u shpreh ai.

 “Kam përshtypjen se pas zgjedhjeve të 25 prillit do të kemi ndryshime në zvogëlimin e shpenzimeve dhe rishikimin e të ardhurave dhe premtimet elektorale nuk do të mbahen nga qeveria”, theksoi Spaho.

“Realizimi i veprave publike, si rritja e numrit të koncesioneve e bën të vështirë që buxheti i shtetit t’i paguajë ato”, përfundoi ai.

Lexoni gjithashtu: 

Nesër miratohet buxheti, shtohen paratë për shëndetësinë, fonde edhe për naftëtarët

Miratimi në parim i buxhetit 2021, PD: Gënjeshtër e madhe elektorale, s’ka rritje pagash reale