Buxheti 2021, Milva Ekonomi: Nuk është elektoral, do të japë impakt në ekonomi

Në një intervistë për Euronews Albania, Milva Ekonomi, kryetare e Komisionit të Ekonomisë tregoi se miratimi i këtij buxheti shihet me një sy optimist mbi të gjitha sepse është i përqendruar dhe i jep një vëmendje të veçantë shëndetësisë.

“Ky buxhet kërkon t’i japi përgjigje rasteve dhe situatave emergjente që po kalon vendi,” – u shpreh Ekonomi.

Ajo sqaroi se të gjithë ata që do të marrin mjekim për COVID-19 që nga 1 dhjetori do të rimbursohen dhe kjo gjë do të sqarohet nga mjeku i familjes.

Pyetur nga gazetarja Mulaj nëse ky është thjesht buxhet elektoral, siç e kanë komentuar një pjesë e madhe apo një buxhet që do të rishihet shumë shpejt kur marrim parasysh paqëndrueshmërinë që sjell situata nga pandemia, Ekonomi theksoi se ky buxhet është optimist sepse i jep rëndësi jo vetëm shëndetësisë por dhe sektorëve shumë të rëndësishëm si bujqësia.

Së fundmi kryetarja e Komisionit të Ekonomisë tha se ky projektbuxhet përveç vitit elektoral do të ketë impakt në ekonomi dhe do i japë përgjigje pandemisë teksa përmendi se ndihma ekonomike është një instrument që nuk lidhet me vitin elektoral sepse siç tha dhe znj. Ekonomi ndihma u dha menjëherë pas përhapjes së COVID-19.

Milva Ekonomi lajmëroi se kjo masë do të zgjasë gjatë gjithë vitit.  

Lexoni gjithashtu: 

Neritan Sejamini analizon buxhetin 2021: Qeveria parashikon rritje të ardhurash në kohë krize

84 vota pro, Kuvendi miraton buxhetin e vitit 2021