Çështja ‘Ibiza’, nis gjyqi ndaj ish-zëvendës kancelarit të Austrisë të akuzuar për korrupsion

Duke filluar nga kjo e martë, ish-zëvendës kancelari Heinz-Christian Strache, njëkohësisht ish-udhëheqësi i ekstremit të djathtë në Austri, do të dalë para drejtësisë në Gjykatën Rajonale të Vjenës. Mbi të rëndon akuza për korrupsion.

Ish-politikani pretendohet të ketë siguruar përfitime financiare për një të njohur, para dhe gjatë kohës së koalicionit qeveritar, në këmbim të një donacioni partie prej 10.000 eurosh.

I kontaktuar nga autoritetet në Austri, avokati i Strache, Johann Pauer refuzoi të bënte ndonjë koment publik para ose gjatë gjyqit, i cili pritet të përfundojë të premten. Klienti i tij përballet me gjashtë muaj deri në pesë vjet burg.

Përtej kësaj çështjeje, kohët e fundit politikanë të tjerë e kanë gjetur veten në mes të drejtësisë, përfshirë kancelarin konservator Sebastian Kurz, i cili i mohon akuzat.

Hetimet për të gjitha këto raste korrupsioni filluan pas transmetimit të një videoje. E ashtuquajtura çështja “Ibiza” çoi në prishjen e koalicionit qeverisës midis Partisë Popullore Austriake (ÖVP) dhe partisë së djathtë populiste të Lirisë (FPÖ) dhe në zgjedhje të parakohshme në maj 2019.

Një video e filmuar fshehurazi në një vilë në Ibiza, tregoi se si ish-zëvendës kancelari Heinz-Christian Strache i premtoi kontrata shtetërore një gruaje e cila paraqitej si investitore ruse, në këmbim të mbështetjes së fushatës para zgjedhjeve parlamentare 2017.

LEXONI GJITHASHTU:

• Zgjedhje në Austri, Kurz synon rikthimin si kancelar pas skandalit “Ibiza gate”
• Kancelari austriak Kurz nën hetim nga strukturat e anti-korrupsionit