Çmimet e arit dhe argjendit arrijnë nivele të larta pas kërcënimit me tarifa

Çmimet e arit dhe argjendit arritën nivele rekord, por çmimet e aksioneve ranë të hënën, ndërsa investitorët reaguan ndaj kërcënimit të Presidentit të SHBA-së, Donald Trump, për të vendosur tarifa të reja ndaj tetë vendeve evropiane që kundërshtojnë propozimin e tij për marrjen e Groenlandës.

Çmimi i arit arriti në 4,689.39 dollarë për ons të hënën, ndërsa argjendi u rrit në kulmin prej 94.08 dollarësh për ons, shkruan BBC.

Metalet e çmuara shihen si asete më të sigurta për t’u mbajtur në kohë pasigurie, dhe çmimet e arit dhe argjendit janë rritur ndjeshëm gjatë vitit të kaluar.

Por tregjet e aksioneve në Evropë ranë ndërsa investitorët u shqetësuan për rritjen e fundit të tensioneve gjeopolitike.

Të shtunën, Trump njoftoi se një tarifë prej 10% për mallrat nga Danimarka, Norvegjia, Suedia, Franca, Gjermania, Mbretëria e Bashkuar, Holanda dhe Finlanda do të hynte në fuqi më 1 shkurt, por më vonë mund të rritet në 25% – dhe do të zgjaste derisa të arrihej një marrëveshje për Groenlandën.

Raportet kanë sugjeruar se BE-ja po shqyrton mundësinë e reagimit me një paketë tarifash prej 93 miliardë eurosh (80 miliardë paund) mbi importet amerikane.

Shqetësimet për mosmarrëveshjen me Groenlandën shkaktuan një tjetër rritje të çmimeve të arit dhe argjendit, ndërsa investitorët u drejtuan drejt aseteve të “strehës së sigurt”.

Vitin e kaluar, çmimi i arit u rrit me më shumë se 60%, pjesërisht për shkak të shqetësimeve rreth tensioneve globale dhe pasigurisë ekonomike.

Megjithatë, ka edhe faktorë të tjerë që qëndrojnë pas rritjes, duke përfshirë pritjet për më shumë ulje të normave të interesit, shtimin e qindra ton ari nga bankat qendrore në rezervat e tyre dhe – në lidhje me argjendin – njoftimin e Kinës për kufizime në eksportet e këtij metali.